Deitado frente ao mar

         A partir do poema de Celso Emilio Ferreiro "Deitado frente ao mar" os compañeiros/as e alumnos/as do IES as Barxas de Moaña fan o poema canción. Un traballo excelente coma sempre.

DEITADO FRENTE AO MAR
Lingoa proletaria do meu pobo,

eu fáloa porque sí, porque me gosta,

porque me peta e quero e dame a gaña;

porque me sai de dentro, alá do fondo

dunha tristura aceda que me abrangue

ao ver tantos patufos desleigados,

pequenos mequetrefes sin raíces

que ao pór a garabata xa nan saben

afirmarse no amor dos devanceiros,

falar a fala nai,

a fala dos abós que temos mortos,

e ser, co rostro erguido,

mariñeiros, labregos do lingoaxe,

remo i arado, proa e rella sempre.

Eu fáloa porque sí, porque me gosta

e quero estar cos meus, coa xente miña,

perto dos homes bos que sofren longo

unha historia contada noutra lingoa.

Non falo pra os soberbios,

non falo pra os ruis e poderosos,

non falo pra os finchados,

non falo pra os valeiros,

non falo pra os estúpidos,

que falo pra os que agoantan rexamente

mentiras e inxusticias de cotío;

pra os que súan e choran

un pranto cotidián de volvoretas,

de lume e vento sobre os ollos núos.

Eu non podo arredar as miñas verbas

de tódolos que sofren neste mundo.

E ti vives no mundo, terra miña,

berce da miña estirpe,

Galicia, dóce mágoa das Españas,

deitada rente ao mar, ise camiño...

Vídeo realizado no obradoiro de animación Plástica As Barxas

Alumnado de 4º ESO e 1º de Bacharelato coordinados por Luz Beloso

Música escrita, gravada e producida no obradoiro Músicabarxas

Alumnado de 1º de Bacharelato coordinado por Seso Durán

Voces: Jennifer Cancelas, Iria Collazo, Katia Alonso, María Gómez, Lucía Parcero, Emma Sotelo, Ana Rodríguez, Andrea García, Ismael Otero, Álvaro Carballido, Alejandro Iglesias e Seso Durán.

Guitarra eléctrica: Luis Camilo Fernández.

IES As Barxas (Moaña)

Audiovisual As Barxas

Curso 2012 - 2013

Making of música




Making of plástica